IDK Euskotren izango da aurrerantzean Ibaeta Kirol Elkartearen izen berria, klubak Euskotren enpresarekin lortu duen akordioaren ondoren. Euskotren denboraldi hau bukatu bitartean eta hurrengo hiruretan izango da taldeko babeslea, eta IDK Elektronika babeslearekin batera, izena emango dio klubari. Lorpen garrantzitsua da klubarentzat, alor ekonomikoan haztea ezinbestekotzat jo baitu Endesa Emakumezkoen Liga gero eta exigenteagoan lehiakorra izateko asmoz.
Goizean egin dute Euskotren-ek eta Ibaeta Kirol Elkarteak hitzarmenaren argazkia, Intxaurrondoko topo geltokian. Han izan dira Euskotren ordezkatuz, Antonio Aiz, Euskotreneko presidentea eta Eusko Jaurlaritzako azpiegitura eta garraio kontseilari ordea, eta Imanol Leza, Euskotreneko zuzendari nagusia. IDKren aldetik, hainbat kide bertaratu dira: Carmen Muguruza presidentea, eta bost jokalari: Iulene Olabarria, Lara Gonzalez, Maria Erauncetamurguil, Toch Sarr eta Mehryn Kraker.
Euskotren-ek bere marka IDKk bere jardunean erakusten dituen balioekin batzea erabaki du, lana eta ilusioa, besteak beste. Aurrerantzean klubak IDK Euskotren izena hartuko du. Muguruza presidenteak esan duenez, hitzarmena une erabakigarrian lotu da, “Endesa Liga etenik gabeko hazkuntza prozesuan murgilduta baitago. Babesle berria makulu sendoa izango da IDK Elektronika klubarentzat, eta klubak elektronika eta mugikortasuneko bi enpresa indartsuren izena erakutsiko du han eta hemen. Euskotren-ek gurekin erakutsi duen konfiantza eskertu nahi dugu, eta konfiantza hori bueltatzen saiatuko gara, Euskotren gure gizartean ezagunagoa izan dadin”.
Muguruzak akordioa hiru urte eta erdirako dela nabarmendu du: “Horri esker klubak egonkortasun ekonomikoa lortuko du epe ertainera. Kirol proiektua sendotu nahi genuen, eta bagenekien hori lortzeko modu bakarra babesle pribatu gehiago lortzea zela. Bilera eta bisita askoren ondoren, etorri da Euskotren, eta gure helburua lortu dugu. Denboraldi honetan sufritzen ari gara kantxan, baina emaitzak emaitza, ilusio berarekin jarraitzen dugu lanean”.
Antonio Aiz ere oso pozik mintzatu da akordioarekin: “Kirolarekin konpromiso berria hartu dugu, Liga lehiakor batean asko saiatzen den taldea babestuz. Lagundu egin nahi diegu, finkatu dituzten kirol erronkak iristeko modua eduki dezaten. Urtetan luzatuko den konpromisoa izango da”. Aizek Euskotren etxean gizon eta emakumeen arteko berdintasunarekin konprometituak daudela esan du: “gure enpresan gero eta emakume gehiago ari dira lanean, eta kirolean ere hori da gure ikurra, besteak beste arrauneko Euskotren Ligaren bitartez, edota berdintasunean oinarritzen den zerbitzu ahalik eta hobea ematen saiatzen. Konpromisoa daukagu Donostiarekin eta Gipuzkoarekin, topoarekin etengabeko hobetze prozesuan murgilduta baikaude”.
Akordio
honen bitartez, klubak Euskotren markaren zabalkundean lagunduko du,
bere irudia talde kirolak erakusten dituen balioekin uztartu dadin:
esfortzua, hobetzeko grina eta talde lana, gizon eta emakumeen arteko
berdintasuna sustatzeaz gain. Gaur aurkeztu da arropa berria. Logoa
aldatu egin da, eta hizki handiz IDK Euskotren ikusiko da. Horretaz
gain, Euskotren marka ikusgai egongo da Gasca kiroldegian,
karteletan, klubaren web gunean eta sare sozialetan.
